Zep 2 | NdeIBE | STEP | Buthanani ndawonye, buthanani ndawonye, wena sizwe esiyangisayo,

Zephaniah 2

1 Buthanani ndawonye, buthanani ndawonye, wena sizwe esiyangisayo,

2 isikhathi esimisiweyo singakafiki losuku ludlule njengamakhoba, ukuthukuthela okwesabekayo kukaJehova kungakafiki kuwe, usuku lolaka lukaJehova lungakafiki kuwe.

3 Dingani uJehova, lonke lina abathobekileyo belizwe, lina elenza lokho akulayayo. Dingani ukulunga, dingani ukuthobeka; mhlawumbe lingavikelwa ngosuku lwentukuthelo kaJehova.

Ukumelana LeFilistiya

4 IGaza izadelwa le-Ashikheloni isale isingamanxiwa. Abantu base-Ashidodi bazaxotshwa emini, le-Ekhroni isitshulwe.

5 Maye kini lina elihlala ngasolwandle, lina sizwe samaKherethi; ilizwi likaJehova limelana lani, wena Khenani, lizwe lamaFilisti. “Ngizakutshabalalisa, njalo kakho ozasala.”

6 Ilizwe elingasolwandle, lapho okuhlala khona amaKherethi, lizakuba yindawo yabelusi lezibaya zezimvu.

7 Lizakuba ngelabaseleyo abendlu kaJuda; bazathola amadlelo khona. Kusihlwa bazalala phansi ezindlini zase-Ashikheloni. UJehova uNkulunkulu wabo uzabalondoloza; uzabenza baphumelele futhi.

Ukumelana LeMowabi

8 “Ngizizwile izithuko zeMowabi lokuchothoza kwama-Amoni, abathuka abantu bami besongela lelizwe labo.

9 Ngakho ngeqiniso elinjengoba ngikhona,” kutsho uJehova uSomandla, uNkulunkulu ka-Israyeli, “impela iMowabi izakuba njengeSodoma, ama-Amoni abe njengeGomora – indawo yokhula lemigodi yetshwayi, ilizwe elichithekileyo nini lanini. Abaseleyo babantu bami bazabaphanga; abaphephileyo babantu bami bazathatha ilizwe labo.”

10 Lokhu yikho abazakuthola kungumvuzo wokuzigqaja kwabo, ngenxa yokuthuka lokuklolodela abantu bakaJehova uSomandla.

11 UJehova uzakwesabeka kubo lapho esetshabalalisa bonke onkulunkulu belizwe. Izizwe ezisemakhunjini wonke zizamkhonza, ngulowo elizweni lakhe.

UKumelana LeKhushi

12 “Lani futhi, lina maKhushi lizabulalwa ngenkemba yami.”

Ukumelana Le-Asiriya

13 Uzakwelulela isandla sakhe enyakatho achithe i-Asiriya, atshiye iNineve itshabalele ngokupheleleyo njalo yome njengenkangala.

14 Imihlambi yezimvu leyezinkomo izalala phansi khonapho, lezidalwa zezinhlobo zonke. Isikhova senkangala lomandukulo kuzahlala ezinsikeni zakhe. Ukukhala kwazo kuzankenketha emawindini, imfucuza izakuba eminyango, imijabo yemisedari ichayeke.

15 Leli lidolobho elingakhathaliyo elalizihlalele livikelekile. Lazitshela lathi: “Ngiyimi, kakho omunye ngaphandle kwami.” Yeka ukuchitheka eseliyikho, isikhundla sezinyamazana zeganga! Bonke abadlula kulo bahleka usulu balikhombe ngenqindi.